دورينى

احم..ازيِك؟ عارفة انك ممكن تكونى حانقة علىّ عشان بقالى كتير مكتبتش ..بس يو نو ..انا نسّاية وانتى هتسامحينى عشان انتى بلوجتى حبيبتى ..أو واحدة منهم بس انتى الأولى ..:)

تعرفى ان أغنية دورينى بتاعة المغنى خان حلوة بزيادة ..

دورينى فى عقل بالك ..وكأن ده وطنه

دورينى فى اسطوانتك ..غنوة كل كلامها عنِك ..

 تعرفى أنى اكتشفت وأنا بفكر كتير كده انى تعبت من اختلافاتى ..انا تعبت من كونى كل يوم تقريبا بتخانق مع نفسى ..العبيطة و العاقلة  ..وكل يوم واحدة فينا تستسلم وتسيب المكان للتانية على وعد انها مش هتسيبنى للتانية تانى يوم ..بيبدلن جوايا وانا المفروض أصالحهم واسمع كل واحدة وأحس بكل واحدة واطبطب على كل واحدة وضحك مع كل واحدة على ألشها او على افكارها المجنونة ..تعرفى انى قربت اتعب ..كل ما افتكرهن اتصالحن جوايا يطلع انه لأ..لسه بيتخانقوا 

تعرفى ان من أسبوع اما شخص ما -ممكن يشوف هنا أ لأ- سألنى ايه الحاجات المجنونة 

اللى نفسى اعملها ..طيب انا نفسى اركب عجل ع البحر ..نفسى يكونلى حد نفطر كل يوم سوا فى مكان مختلف ..ونجرى الصبح فى مكان مختلف ونفسى اسافر لوحدى ..او مع حد ونّاس ..تعرفى ان اللى بيونسوا الروح مبقوش كتير ..

هو انا ليه كئيبة دلوقتى ؟ معرفش

مبقتش أحب القهوة أوى ..او يمكن هى زهقت منى ..او يمكن نفسى حد ما هو اللى يعملهالى .. 

رتبينى بين همومك ..واغسلينى مع هدومك ..

على رأى راء ..هننجو..هو اصلا مفيش حل تانى ..ولا فيه وانا معرفوش ؟!! هيوحشنى درس د.هبة الاسبوع ده ..متعرفيش انا بحب الست دى ازاى ..ونفسى اتعرف عليها بس 

خايفة او تقدرى تقولى عاجبنى الهالة اللى انا حطاها فيها .

.المهم بحبِك يا أنا..جيبيلك كتاب جديد :))

اى كلام

نوستالجيا ..فى حب مبنى عمارة اللى فى هندسة القاهرة ..المكان ده فى مناسبات حلوة وغريبة كتير مثلا :اول ميتنج ..ريهرسال ..اما عرفت انى هيد..

فاكرة اصلا اول مرة قريت الكلمة دى كانت فى كتاب تشى جيفارا وكانت بتفكرنى بالجبنة النستو :))

انا بحب بطلات باولو كويلو اوى بحسم اخواتى فى الروح ..ماريا ..فيرونيكا ..فاطمة انتوا أجمل بنات مفترضات ..

الهروب ممكن يكون يا اما لاكتئاب مضنى وساعتها تكتئب بقى وتقول ان عندك مرض نفسى بس هو اللى بيكون عنده مرض نفسى بيعترف بده ؟؟؟؟ أنا نفسى ساعات كتير اما بمر بحالة ما مش بعترف بنفسى بيها .. يا اما الهروب يكون زى احساس الجوكر كده فى باتما كل مابص جوايا أحس بضحك عبثى كتير اوى ..الا بمناسبة العبث ؟ الكوكب بقى عجيب كده ليه ولا أنا ادراكى اللى اتسع ووسع وبقى باين على حقيقته ..انا اصلا مبقتش فاهمة اى حاجة .. ولا عايزة افهم يمكن .. 

قلتلك انى بقيت مقتنعة فعلا انى عايشة حياة حد تانى ..زى التقمص الرجعى المزدوج اللى قال عليه عباس او عونى ...كأنى أنتمى لعالم تانى ..واه ..قلتلك انى هموت وهكلم راء فى التليفون بس مكسلة .وعمالة ابعتلها اشارات يمكن توصلها وتكلمنى هى ..

عارفة نفسى يكون لى معارف فى كل دول العالم ..وتعرفى انى الريدى عندى المعارف دول من كل لون وطعم ولهجة بس لسه معرفهمش ..بصى متركزيش 

واحشانى ايطاليا جدا وعايزة ابدأ اتعلم ايطالى ... 

عارفة ايه الأوحش من الفقد ..الخوف اذا مكانش ده أوحش حاجة فى الكون فقوليلى ايه الأوحش .. ؟؟؟

مش كان زمانى فى اسكندرية دلوقتى ..هو عيبها الوحيد انى مبعرفش اكتب هناك عشان على طول بيكونوا مركزين معايا بس كفاية انى بحكى للبحر هو بيفهمنى 

ست الكل ..هيدى أنا :))

انا منافقة الكترونيا ودى حاجة فخيمة اوى الصراحة ..

ناس كتير ممكن تغير رأيها عنى لو شافت المدونة هنا ..أو لأ ..تعرفى انى فكرت مرة احط اللينك بتاعها فى بيو تويتر واشوف ايه اللى هيحصل ..اكشن للصبح أو لأ ...

هو انا مكسلة اخرج بس لو فى دافع كافى انى اخرج هخرج ...