بكتبلك

وما الكتابة سوى السِحر الذى نُحول إليه فجائعنا..
تلك الصفحات البيضاء هى ساحات انتصاراتنا فى خضم هزائمنا .

و"قلت بكتبلك ..هيك كانوا بيعملوا العشاق "

soul racking day

• ياله من عالم ظالم لا يمنحك حتى فرصة البكاء 
  

  خرطوش فى راسه .. نزيف ف المخ .. غلط ولا صح .. بتتحججى ... مشهد أوقات فراغ ..خايف ..مش عارف هقوله ايه أما اقابله ...

  خايفة ؟؟ اكيد
  ناس وحشين ..شتمت كتير..ليه بتعمل كده مع صاحبتى
  قهوة

  مسكّرة زيادة .. فاكس صانداى ..أحلام مش وقتك دمرتينى بدل ما تحيينى كالعادة

  لوحدى.. هى مبتردش ..القمر انتحر ..

  دموع أووووى كتير
• 
  

  نانسى عجرم بتغنى فى الميكروباص ..عربية مطافى مش عارفة تعدى ..خناقة فى المنطقة العشوائية سلوكا ونمطا..
  لمحته بنظرة خاطفة لما شفت حماسه و هو بيركب الميكروباص بتى شيرته

  اللى مكتوب عليه ..للحرية جايين يا بلادى .. بلاد ايه ؟ بلاد الدم كما النيل؟

  دموووع مازالت كتير

  أكد على صاحبه انهم فى الخيمة اللى قدام المجمع ..
  خفت عليه ..بصتله وكأنى بتمناله الشهادة و خايفة عليه من الموت .. كان غريب و مشى و انا بدعيله بحكم اخوتنا فى وطن بيبع ولاده ببلاش

  ودموووع كتير محبوسة .. يارب افرجها

انبوكس

انبوكسى لنفسى 

ليه ؟ ماله الوورد ...

مش عارفة .. 

بكتب فى 5 أماكن مختلفة تقريبا كل واحد منهم بطعم .. يا بخت اللى بيراقبنى ..أو اللى هيراقبنى ..أو أقولك .. يا بختى :))

بس الانبوكس ده فيه كلام من قلبى ليّا ..غير قابل للنشر ..ع الاقل حاليا 

عايزة ارتاااح

عايزة ارتاااح 

تعبت ..أينعم ماكنتش فاكرانى نايتى كده 

بس بدأ طحن الحياة .. يومين بس أخدهم اقضيهم كماأريد و اقفل موبايلى فيهم و معبرش غير اللى عايزة اكلمه ..مش مكتئبة ..بس عادى يمكن عشان كان شهر أنتخة بعدها ..ضرب ضرب 

يمكن ... بس خير لعله دايما خير 

سحقا

يوم منحوس..اتقالى يا غبية حوالى 5-6 مرات
عايزاه يخلص أوى
مفهومة غلط بشكل صح أوى....
كان نفسى أكتب بس مفيش نصيب
كنت عايزة أقرا بس بكره

اليوم ليه مينفعش يبقى 3 أجزاء

مصر ..ليه بيحلالك تقلبى وقت الاجازة ..

رأيت كثيرا ..

النفاق ..

حسانى بقيت انافق نفسى فى حاجات ..اللى ليها علاقة بيا ..بس الحمد لله مش بنافق 

اللى حواليا اوى زى ما كنت بتصنع مع بعضهم

انا بنى ادم حلو اووووى ... اموت واعرف مين فهمنى العكس ..منها لله الكلاكيع النفسية 

أمى ..اللى مش موجودة انا بحبك اووووى

مارسيل خليفة صحى حبك فيا 

سلامٌ عليك...سلامٌ عليك

. 

أما آن لي أن أقدّم بعض الهدايا إليك

 

أما آن لي أن أعود إليك؟ 

اما ان لى ان اعود اليك ؟

هدعى ربنا يجمعنا فى الجنة ..هو ينفع نتمنى بنى ادمين فى الجنة ؟؟

ماما ..مامتى ..أمى ... مامى ..

 أحن  اليكى <3

مش لازم عنوان

ياااااه 

واحشنى هنا اوى ..اليومين اللى عدّوا كانوا اغرب من الغرابة 

حوار عرض الازياء ده عنصرى أوى ازاى يعنى يكون حتة هدوم اهم من الشخص اللى لابسها ..لا وكمان كانوا زمان يقولك العارضة دى شماعة مش لازم تكون حلوة الناس هتركز فى حتة اللبس مش البنى أدمة ..حاجة غير أدمية اساسا

أنت أكتر حد مخنوقة انى زعلته..انت تستاهل الاعتذار دونا عن خلق الله كلهم ..حقك على راسى ولا اقولك ؟حقك على قلبى 

ماما ..شخصية بنتك اللى بتقولى انك عارفاها ماتت من ثانوية عامة وسابتلى شوية رغبات حققتهملها وانتهى الامر ..قُضيت 

(ماما (اللى ماما هى يعنى

واحشانى ومحتجاكى ... وسحقا كبيرة :((

Je t'aime :)<3

بكره جنة الوحدة اللى عشت فيها مع نفسى ..تنتهى.. ادعيلى بشدة

امبارح حاجات كتير أوى اتكسرت أوى ..باريس لوحدها اتكسرت مرتين ..روحى من جوه اتخدشت كالعادة بقى معادتش تفرق مش قدامى غير انى اصهين واتناسى كتيييير ... حتى مش قادرة اتكلم او احكى فى اى حاجة حصلت المهم انى كويسة نوعا ما و ربنا بيستر 

عارفة اكمنى فاضل 45 يوم وابقى مش مرهقة ..شكلى هجمع كل غلطاتى واعملهم ال45 يوم دول كوضع ازازة الشمبانيا اللى بيحتفلوا بيها بالمناسبات حزينة وسعيدة ..

الوقت و الصُدف .. كانوا كارهننى اوى امبارح 

# العلامة دى معناها انى ببرر اللى بكتبه عشان متفهمش غلط المشكلة بقى انى لمّا ببرر بتفهم غلط :))

لخابيط

عشان بحبك*

بأى تشكيل كانت عدّيها :))

ماما كانت بتسألنى بتحبى مصر ؟ وهى جاوبِت من غير ماتستنى اجابتى ..اكيد لأ*

O.o

اللى هو كده يعنى ..اجابتى كانت ..بعد تفكير ..صعداء 

انا اقدر محبهاش ؟؟ مصر دى حاجة زى زرعة جوايا ..حاجة كده متتوصفش ..تتحس بوجع ..انبساط ..دموع اوى ..وابتسامات كتير 

مصر يعنى الحاجة اللى ربنا خالقها فيّا وفى كل المصريين و ساكنى الاقطار .بس يبقوا يحكوا هم فى مدوناتهم :))

بغض النظر عن روحى الباريسية 

بس اكيد فيه حكمة انى أتخلق مصرية ...

خايفة ف يوم اكره مصريّتى ..هى اينعم بتبكّى قلبى من ساعة الثورة بس هى مسيرها ف يوم هتنّور ..التشاؤم مبيعملش حاجة 

القصايد تتسمع احسن ما تتقرى ...*

هتكلم لغات كتير ..بس طولة العمر و البال بقى :)*

شخص ما ..شبه نزل من نظرى تدحرجا ..ربنا يستر و ميتعورش امّا يوصل للقاع*

أفكار منطورة

سحقا أما بوستاتى على ذينك الجروب تكون مع بوستات تافهة و صور عجيبة و ازاى تمنعى تساقط الشعر بس مجبر اخاك لا بطل 

كفاية انها ضحكتك .. فاكس الساعة اللى طلع عينى فيها :)

نيو بابا ... بس يا هبلة 

بحبك فى الله ..هل اصلا ينفع ؟:)

الصلاة خير من النوم ..الجملة دى بالذات احلى حاجة فى أذان الفجر 

قطر اتقلب ..يلا اهو ارحملهم من الحياة المغبرة دى

شخص ما لو شاف المدونة دى احتمال اكون

 in deep shit 

هما الصراحة اشخاص كتير 

الكتابة فى مدونة عاملة كانك بترمى رسايل ف البحر مش عارفلها امتى ولا فين هترسى 

حبكت البيت يبقى فاضى ف اليوم اللى المفروض الذم نفسى مذاكرة فيه 

قالّك ... مامته طيبة طب ما كل الامهات طيبات  

ساعات..

ساعات بتحس انك متقمص روح اشخاص معينة فى طريقة كلامهم ..تفكيرهم ..صنع حاجة ما ..كأن وانت بتفكر او بتتكلم او بتعمل الحاجة دى روحهم بتخش عقلك وتحركك زى راتتوى كده فى الفيلم أمذا كان بيحرك الطباخ ..

مش بتحس انك بتقلدهم ..بتحس  ان اللى انت عملته ده بطعمك وطعمهم كانكوا بنى ادم واحد أو كانك كنت عارف الحاجة دى من زمان واما شفتها بايدهم افتكرتها و عملتها تانى 

بدأ يحصلى الحوار ده كتير ومع كذا حد ... بالرغم انى بكره التقليد عمى بس اللى بيعملوه ممكن بحب روحهم بيشابه اللى روحى بتبقى عايزة تعمله ..فبتفرح انها لاقت حد فهمها وعمل اللى ف دماغها و تحاول تعمله هى بطريقتها عشان تثبت لنفسها انها تقدر تعمله :)

عموما ..شكرا للناس دول اللى أحيانا كتير يا بيفهموا غلط أو بيضايقوا بس انتوا ريللى مش عارفين ازاى امّا روحى أنا تعمل حاجتكوا بطعمها :))

لمّا أموت ..

كنت فى عزا

وشعور سخيف اوى انى عشان كنت مكتئبة اكتئاب يملى المحيط الهادى امبارح ..ملياش نفس اتضايق النهاردة ..واحساس اكثر سخافة منه انك تبقى هتموت وتضحك وسط العزا ..

كوميديا اوى وكأنك شارب حاجة أصفرا ولا حاجة ..

بالنسبة لرغباتى ..انا العزا بتاعى مش عايزة ناس تعيط ولا تنوح ..عايزاهم يعرضوا ليا فيلم مصور عن حياتى و لما يشوفوه قشطة مسموحلهم يعيطوا ..عايزاهم ييجوا بأحلى لبس عندهم مش اسود نهائى ..

القران اللى يتذاع يكون بصوت العريفى و بعد ما القران يخلص ..كل حد منهم يطلع يتكلم عنى بالخير أو الشر و ميخلصش كلامه غير اما يدعى لى أو عليّا حسب يعنى :) 

عايزة حد يطلع يتكلم عن الحكمة من الموت و انهم يتعظوا من موتى و ميكونوش جايين يرغوا ويشربوا قهوة وخلاص .. عايزة الدنيا تكون مليانة ورد ..ورد كتير وكل اللى ييجى يحط وردة على قبرى 

عايزة اى حد من اللى بيحبنى أو يعرفنى يعملّى صدقة جارية من اى نوع 

وعايزة لو لحقت اعملها قبل أما أموت يعنى ..اعمل

 bookmarks

عليها دعاء ليّا عشان متنسيش ..وان شاء الله انا هكون متنسيش 

يارب أموت موتة محسش فيها بمدى ذلى ..لا غرقا ولا حرقا و لازحلقة 

عايزة أموت يا ساجدة يا شهيدة 

اللهم احسن مثواى وأرزقنى حسن الختام 

ولا تجعل دنياى فى قلبى واجعلها فى يدى 

امين 

لكل اللى بيقروا الكلام ده بعد موتى أو ف حياتى 

ادعولى :) 

الموت ..حاجة حلوة

هتكلم عن الموضوع بنظرته الفلسفية من وجهة نظرى اللى اكيد تحتمل الخطأ وممكن انا اللى بعد فترة اغلطها ...

بس حد عمره فكر يحب الموت ؟؟

"بالرغم من قساوته وان قصة اى حد مع الموت هتكون شبه "الجميلة والوحش

عمر حد فكر الموت بيعمل ايه فى الناس غير انه يقتل كام حاجة حلوة ويوجعهم من جوا ؟؟

طيب 

نشوفه من ناحية ان الموت ده حاجة عظيمة جدا عملا بمبدأ ان الله لم يخلقنا ليعذبك بل ليبتليك وكذا ...

1- الموت لما بياخد روح واحدة بيأثر على اكتر من واحد والدايرة بتتسع بطريقة تفوق اصلا دائرة التأثير الخاصة بالشخص المتوفى .. يعنى الناس اللى بييجوا يحضروا عزا شخص تانى  يعرفوه من قريب او بعيد بيتعظوا و بيعرف كل او حتى بعض لا بأس بعدد هذا البعض اد الحياة حقيرة ..حياة متسواش رزاية ممكن تشرق فيها ..حبة مية ممكن يغرقوك ..نفس يخرج منك وميرجعلكش .. لحظة اما قدرك يكون على ايد عربية .. ولا طلقة خرطوش وللا ولا ولا ...

2- رسالتك ؟؟ طول عمرى مؤمنة ان كل واحد ربنا خلقه يؤدى رسالة و يموت بعدها ..مممكن الرسالة دى تكون بموتك اصلا ..يعنى موتك يكون رسالتك ..وانك اما تموت تسيب بصمة فى اللى حواليك بطريقة او باخرى ان هم لازم يكون ليهم رسالة ..و يحاولوا لو لقوا ان الشخص ده كان ممكن يموت موتة احسن من كده .. يتعظوا و يطلبوا من ربنا ان يرزقهم حسن الختم وموت يليق بجلال اللى كانوا بيعملوه فى حياتهم وعليه يعملوا شئ جلل ...

ويحاولوا يسعوا و يدوروا ع الرسالة بتاعتهم ملأ روحهم ..

3- الموت بيطلع البنى ادم اللى جواك ..بيمحى تعجرفك و ظنك انك برنس السنين وان الكون تحت اشارة من صباع سيادتك وانك الامر والناهى و مانحوها من الصفات اللى بنتغّر بيها ...

بتعيط و بتحس اد ايه انت ضعيف اكتر من محمود عبد العزيز فى ابراهيم الابيض ... بترجع تعيد حساباتك بتبقى .هش و نقى لحد بعيد ومش بعيد انك تتغير و تصبح بنى ادم جديد غير متدنى حبا فى الدنيا كحال معظمنا ...

4- بتحس بالفقد وده احساس وحش بس هنبصله حبا ... الموت بيعرفك قيمة كل بنى ادم فى حياتك وازاى ممكن ف ثانية بل اقل وبتحاول تقدر كل بنى ادم وتعز مقداره

وتكون بتعامله كأن كلكوا مش دايمين لا لبعض ولا لغيركوا ... و تتقى ربنا فى حبك ليه ..الحب بمنعاه الاوسع من الافق .. 

الموت ..كلمة لو اتصالحنا معاها ممكن تخلينا عايشين احسن ودى حكمة ربنا منه لاننا كبنى ادمين لازم نكون عايشين لهدف وكاضعف الايمان ليه منعششى واحنا بنحضر حقيبة السفر للرحلة الاخيرة المكتوبة علينا ...

الموت حق لينا ..وواجب نتحضرله كويس 

_ الموت حاجة _ممكن

تكون حلوة بس انت اللى هتكوّنها هذا الكون ..

يوم 13 ذات نفسه

لم يُخلق الدمع لامرئ عبثا ..الله أدرى بلوعة الحزن 

ويالها من لوعة ..بس البكا فعلا بيطفيها أوى ..احساس بعد العياط والنوم انك تصحى ولا كأن حاجة حصلت ..كأن كان فيه عاصفة ومطر وبرق ورعد وكل الكلام ده وتانى يوم الشمس طلعت والورد فتّح و الدنيا رجعت حلوة تانى 

الحمدلله على نعمة الدموع .. احساس انك غسلت همومك -و صالحت نفسك-ولو مؤقتا

..وترجع تستأنف حياتك عادى كأنك اتولدت من جديد وكانك معجون بالتفاؤل اللى كنت مخنوق منه الليلة اللى قبلها ..

 

ليلة 13 :)

متفقين اننا مش فى مكاننا الصح ..بس مش عارفين ايه هو مكاننا ..طيب قشطة ان عندنا تخيل بس هل كامل ؟

لأ ..طيب ليه مش مكاننا ؟؟ احساس الخنقة الخنيق اما الدنيا بتوسع و تحسى انها فاضية عليكى ..وأما تفضى بتكونى عايزة تمليها بالحاجة اللى انتى بتحبيها

عارفة الصداع اللى بيجيلى بعد كل امتحان ده صداع الانفصام ..الصداع اللى بيلح عليّا انى اشوف انا ميين ميين فعلا مش البنى ادم اللى عايش دلوقتى ..هنا ..جوايا

النهاردة سألتنى : أنتى مبسوطة ؟؟؟

الاجابة كانت لأ ..اتصدمت ..ازاى وأنا مش ناقصنى حاجة والتوازن الدينى العقلى الاجتماعى الى حد كبير مظبوط ..بس الروحى ..أنا روحى مكانتش مبسوطة وبدأت تضايقنى بقالها فترة عاملة زى ضرس العقل بس هل يا ترى هى بتعقل ؟

دى هى اصلا هتموت وتتجنن

...تعرفى ان الاكتئاب ساعات كتير بيبقى طعمه حلو ..او مر بلذة

احساس السجن ..روحى مسجونة فى مكانها من سنة كان الاحساس ده بيتخلق ..دلوقتى الاحساس بيصارع وكانه بيتولد ..حاسه بمخاضه

عايزة اسافر .. وف نفس الوقت احساس عدم الرضا اللى انا فيه ده حقير ...وهتحاسب عليه ..بس يارب انت عالم بيا و عارف اد ايه وحش احساس الغربة

والكوميديا انك تدوّر على اغنية تعيطك ..تلاقى اعلان كوكاكولا بتفاؤله اللزج بيظهرلك كل شوية ..

لسان حالى بيقول : ادى اخرة انك تكتمى كتابتك ...منها لله السيوتكال ...

باريس : وجعى ... خايفة انساكى ...

اول مرة احس ان اغنية فرنساوى ممكن تعيطنى ..انا مش فى بيتى اصلا ...

طيب اسافر ..اكسر الحلم وارجع ... او اعيشه ومارجعش ...

انك تحاول تنسى

مش ميعاد انى اكتب اى حاجة ناو اساسا 

(وده اصلا عنوان شبه عناوين كتاب احمد العسيلى (الكتاب التانى 

بس الموضوع ومافيه هو ان ازاى انك تكون تحاول تنسى حاجة معينة والقدر يعاندك ويفكرك بها وانت خلاص على شفا حفرة من هذا النسيان ..كل ده بيخليك تقول ..

سحقا ملأ الروح 

مانا كنت نسيت !!!!!

وترجع تانى وأصالحك تانى زى ما أم كلثوم قالت 

بس بتحاول ترجع تدور ازاى تبدأ أو تستأنف رحلة النسيان من الاول ...لان هى كده كده هتكمل يعنى هتكمل :)

دكتور للروقان

!ما أجمل انك تكون مستشار للجنون 

دكتور للروقان "بنطق القاف" 

الناس تكلمك امّا تتوه من دنيتها و متلاقيش انبساطها 

و انت تقعد بقى تسمع و تشغلّهم 

 موسيقى..موسيقى بس على كلامهم أد ايه الكلام هيطلع بدل ماهو زهقان هيطله بيغنى ..فرحان ويمكن

يرقص كمان .. لمّا حد منهم يشوفك يسألك ازيك يا مجنون أو فى حالتى : يا مجنونة (أحلى ندا فى الدنيا )

و يقولك ايه الجديد؟

فى الحياة الواسعة الوسيعة طبعا مش فى الدراسة ولا السياسة ولا ولا ولا 

(فى الفلسفة و الحياة و أد ايه الواحد براحة باله و روقانه (بنطق القاف

ممكن يكون ملك زمانه ويملك جنته فى صدره :)

وياسلام لو جنونك ده مجنون بذاته كده 

كل يوم بحالة جديدة يوم يخليّك تبعت لنفسك هدية ..يوم يخليك تغنى و تسمعك وانت بتغنى 

ويوم يمشيك على اى كورنيش و يشربك حاجة سخنة أو يأكلك ايس كريم و يفرح امّا بس تبتسم 

 ويحب حاجات

كتيرة و مختلفة يوم يعلمك فلامنكو ..ويوم يسمعك مزيكا من غير ما يقولك نوعها ..

ويعرفك على ناس جديدة .و يحيرك بقى امتى يبينك عاقل قدامهم و امتى يكون شعنون :)

ما طبيعى بقى مش مجنون ..حقه يتجنن على هواه و على حسب ما جنونته تتطلع

(انا جنانى عزمنى فى رأس السنة ..حاجة معملهاش معايا(الى الان 

(أى أنسى .. وكان يوم ميتنسيش خلانى اثق فيه واحبه (جنانى طبعا  

وأتاكد انى اصلح اكون مستشار للجنان ..اللى عايز يتجنن يقولى ...هفيده بالحق 

جنانى بيحب يروح فرنسا كتير أوى ...مبيزهقش..منها 

وبيحب يغنى ..حتى لو صوتنا مش جامد بس بيبسطت ودانى 

و بيحب يعزف ..حتى لو لسّه بيتعلم 

جنانى مؤمن اننا لو مش بنى ادمين ..فاحنا خليط من كام لحن حلو على اغنيتين مجانين و

 

كتير من نهر السين ..

وان مكاننا الاصلى مش كوكب الارض ..مكاننا فى الفضاء مش على كوكب معين ..ممكن مكاننا فى قلب كل مجنون فهم الحياة صح واتشرب جنانها بالفعل و حسّ بقيمة عقله اللى انتحر وسابله الجنان يرتبله الفوضى و يحولها لغنا ...رسم..رقص..وألحان ..و انبساط 

جنانى ..أنا بحبك :)

فلتر...

أمّا تحط فلتر على اللى بتكتبه 

بتخاف يحرك مشاعر بصورة مبالغة فيها و يزرع فيها مشاعر مش وقتها و مش وقت قلوبهم الصغيرة تحسّها 

أو تخاف انك تذنب بانك تحرك احاسيسهم عن حب و غرام... موجود بس فى الاحلام 

ساعات بتفلتر عشان خايف عليهم ..

ساعات بتكون مش عايز قلمك غير انه بس يوصل رسالة 

انه يكون بيحبهم حب مختلف :)

ما الاقلام اللى بتحكى عن قصص القلوب كتير 

بس الاقلام اللى بتوصّل الحياة بطعم تانى مهياش كتير ..

.

.

.

لمّا تمطر ..

السما بتمطّر 

كنت حاسّة انها بعد التراب ده ..هتصلح الجو وتصالحنى وتمطر ..وقت المطر بيكون ليه قدسية خاصة 

الشتاء بجبروته و سطوة حضوره ... 

وقت المطر بيفكرنى بالدعاء ..بيفكرنى بالشخص اللى بدعيله وانا لسه معرفوش ...

صوت المطر ..ليه مزيكا ميفهمهاش غير اللى ودانه بتفهم مزيكا ومش كل مزيكا زى المطر ..

المطر ..بيشبه طبطبة ربنا ع الارض .. و هدية السحاب 

هدية لكل ملهوف يدعى ..ولكل طفل بيجرى ع البلكونة عشان يلمس بايده المطر و يتمرد على ندا أهله انه يدخل عشان الدنيا برد ..هى صحيح الدنيا برد بس ..قلبه كله دفا ..

وأما المطر يخلص بيسيب ريحته

 

و أما صوته يهدى بيسيب ذكرى

تأبين..كزفاف

ياله من جنون ..

على الحان موسيقى  I did it my way لفرانك سيناترا ..يجلس المدعوون بأماكنهم

يزدان المكان بأشجار الصفصاف التى تتدلى كشعر غجرى...و البعض يبكى فرحا..حزنا ..خوفا وأملا..

تهدا الموسيقى قليلا و يصعد المدعوون على خشبة المسرح لينعونها .. بخلاف العادة يسود المناخ رائحة السعادة والحزن الممزوج بالشجن ...والحنين بقليل الندم الذى يأتى فى ذيوله تعّلم ..

بصفات عديدة نعتوها ولكن عندما صعدت انا لأتكلم عنها ..غاب عنى المشهد لوهلة و اصابنى الارتجاف فهل ياترى سيكفى الوقت لأتحدث عنها كما يجب .. هل ستسعفنى الكلمات لأخبرهم ماذا علمتنى ؟..هل سيفهمون ؟؟

لقد عرضّتنى لأطول رحلة فى ال roller coaster  بمنحنيات صاعدة جعلت قلبى يصعد حد القمر ليسّلم على نجومه و منحنيات هابطة ..اه لكم كانت كثيرة ..جعلتنى اصطدم بى و ما اشد ان يصطدم الانسان بذاته .. وأرجحتنى كثييرا .. حد الضحك احيانا و حد البكاء حد الضحك احيانا أخرى ... أاحدثهم عمن عرفتنى بأشخاص ؟ هل سيتمكنوا من شفرة حديثى اذا ما أخبرتهم كيف اننى صرت شخصا لاشخاص مثلما صار لى اشخاص ...

سحقا لحيرتى .. و عتبا للوقت الذى حتى بعد رحيلها مازال يمضى مسرعا..

سأبدأ خطبتى لعلها تكون عصماء او لعلها تكون البداية ...

ابتعدت عن عيونهم التى تلاحقنى وتطلعت للسماء أطلب مددا ..

كانت مجنونة ..هو وصفى لها ..اصابتنى بالجنون بكل براءة و كانت تضحك منى وكأنها لم تقترف خطا بحقى عندما اصابتنى هى بجنونها هذا ..

جنون جعلنى اذهب لأماكن لم اكن اتخيل فى حياتى اننى سأتمكن يوما من الذهاب لها وحدى.. وأماكن صارت الاقرب الى قلبى ..واماكن تمنيت لاعوام ان اقضى بها بضع ساعات فقط ..صرت اقضى بها وقتا يزيد عمّا اقضيه بمنزلى ..

جنونها جعلنى أرانى باختلاف رهيب ..أو اختلف عنى واقترب عنى ومنى كثيرا من الاحيان ..جنونها صار بدمّى ولن انزعه منى طالما حييت .. بدأ جنونها بى و فى..فى يوم من مارس العزيز ..ويا لعزته و قربه من قلبى وبخاصة هذه المرّة ..حولنى كليا .. أنضجنى كما ميكروفا ينضج طعاما ..غيّر ذوقى الموسيقى ..اعادنى عاشقة للكتب .. اخرجنى من جسدى وطاف بروحى وأسكنها بباريس القلب .. وجعل كل يوم بمثابة درس لى .. .. غيّرنى و ممتنة انه فعل و أدين له بالكثير ..شكرا J كما لم أشكر احدهم قبلا..

أذكر انه ذات بحر .. تعلمت الحرية ..وما اشهاها كثمر العليق و الشيكولاتة .. وما اغواها .. كالنار تغري الفراشة بالاقتراب و تترك مجازفة الاحتراق او لا للعبة القدر ..عاهدت نفسى أننى حرة ملأ روحى و هى ولدت حرة دون قيود على تفكيرها أو مشاعرها ..هى تتقبل الاخر و تحبه وتكره خطأه أو على الاقل تحاول ذلك لكن كفاها انها توقنه ..حرية علمّتها لذاتى بذاتى .. مكنتنى بالانفراد بنفسى كثيرا لاعيد تفكير أو لأرجع بسمتى على وجهى أو لأكفف دموعى و أنهرنى عند الخطأ بكل سماحة و رفق وأحيانا اقسو لأتعلم ..

صمتت فقد مر شريط الاحداث مسرعا كقطار اصابنى بالدوار .. ووسط فزع من كانوا يجلسون بالمقاعد الاولى ..بعد أن سمعوا دقات القلب وهى تطرق سندان الصدر ..استكملت وحاولت أن أوجز ..فقد تعلمت ما الوقت و ما كنهه ..هو الثروة الأبدية لدى كل منّا .. من حكمة ربى ان جعله أول ما نحاسب عليه ..ولكم ارهقته امتلاء و لكم ارهقنى بضيقه الذى كان كثيرا ما لا يسع مشاريعى وخططى ...ولكن بلطف الله و حسن تدبيره الذى علمّنى التوكل ..كنت أتواجد بمكانين فى ان واحد ..و بقلبين فى حديث واحد .. وبنعمة الصحة وكفى بها تاجا كنت أذهب لاكثر من 3 جهات فى يوم واحد ..ودون ارهاق.. و المواصلات انها قصة أخرى ليس هذا بسياقها ..

تعلمت منها ما الاولويات .. هى ماذا يملك الاهمية لك فى هذه اللحظة وماسواه يأتى لاحقا .. هى ما يشبع قلبك نشوة او يثير عقلك طموحا أو يملأ روحك رضا .. تلك الاولويات و لكم تأرجحت و لكم فاجأتنى بتغييراتها المستمرة .. بجنون ..

الوقت .. صديقى الذى اصاحبه بحذر و اجلال خوفا من غدره و حبا فى استغلاله و املا فى ان اتباهى به فى قيامتى ..احذروا ضياعه .. او احذروا ان يضيعكم ...

الاثنين .. سبقه السبت ..هى الايام التى تكون لى و فقط لى .. يعتريها الجنون اكثر مما عداها من ايام فتخطيطها يرجع لى اولا واخيرا .. كانت "اثنيناتى" تبدأ بأن اعرف وجهتى واحيانا لا لأتعلم كيف اخذ القرار بكيفية أملأها .. وكانت تفاجئنى بأنها هى التى تملأنى ..

لمحت ابتسامات بعض الحضور ..بالطبع ينتظرون دورهم فى الحديث ..عنهم بالطبع ..

حسنا ..شكرا لكم .. لا داعى ان اذكر اسماءكم انما انتم تعلمون مكانكم فى جنبات القلب .. و تعلمون اثركم و بصماتكم فى الروح .. وذكرياتكم وخبراتكم التى نقلتوها لشريط حياتى أو صنعناها معا غيرت فى جيناتى..انتم المكسب الاغلى ..انتم كنز الرحلة والذى ان زاد على قيمته شئ فلن يكون سوى تلك الصديقة الاقرب منى لى .. ولدنا سويا و تربينا سويا و بغرور نتبادل الادوار لتصبح أمى أو اصبح أختها الكبرى ..هى صغيرتى ..

هى " الانا " العزيزة ..كبرتى عزيزتى و قريبا ستبلغين عشرينك بكل فخر بك ..و بكل انتظار ل انشطار شرنقتك لتنطلقى فراشة تبنى أمة و تكون نجمة ..العالم ينتظر الكثير منك ..

عودة للابتسامات التى تعلو وجوهكم ..يا من تدرون جيدا من انتم ..جزاكم ربى كل الخير ..استمروا بوضع بصماتكم ..و ممتنة جدا لانضمامكم لقائمة معارفى ..اخوتى ..واصدقاء ..وأكثر.. كثيرون انتم ومميزون انتم وربما تٌمنحون منى تلميحا عمّا تمثلون لى أو عمّا تعلمته منكم ..

أما عن الامال للمستقبل قريبه و بعيده فما أكثرها وما اكثر طموحى لمعرفة ما لم اعلمه بعد و تحقيق ما اعرف منها...

9-9-2014  ستكون مميزا بعون الله J ربما يشهد هذا اليوم توقيع أول كتبى ..أعد لك منذ الان ..

وفى الختام

بكل عرفان وامتنان شكرا

سيلانترو كافيه - المعادى .. حيث القلب وحيث باريس J

فيروز ..منير..أحلام ..رضوى عاشور..محمود درويش ..جوليا بطرس .. جاهدة وهبى .. ريما خشيش .. ماجده الرومى .. نزار .. عمر بن الخطاب ..الشافعى .. وتستمر القائمة ...

شكرا يا من تجمعنا اليوم لنذكرك و نودعك وقلوبنا يأسرها الشغف بتذكر تفاصيلك وكل ما منحت واخذت

2012 .. سنفتقدك ..ارقدى بسلام .. ليكتنفك الحب .. و يرعاك الرب ..

انتهى وقتى ومازال بالقلب أحاديث قد ترى النور أو لا ...